E lë auai le Palemia filifilia o Niu Sila Christopher Luxon i le fonotaga a le Pasefika, Pacific Islands Forum ina ia ave ai lana faamuamua i le osiga o le faigamalo fou a le atunuu.

Saunoa Luxon o se fonotaga tāua ma o se avanoa tele e fausia ai faiga faapaaga ma isi taitai o le lalolagi aemaise lava i le va ma atunuu o le Pasefika.

E ui i lea e lē o mafai ona auai ona o lea e lei mausali le osiga o le isi faigamalo, e ala lea i talanoaga ma isi pati.

Ae o le lē avanoa ai la o le Palemia filifilia, o lea o le a malaga iai le sa Sui Palemia Carmel Sepuloni mai le paeaiga faatoa uma atu ma le sooupu o le va i fafo a le National Gerry Brownlee.

O le Aso Faraile na maua ai le iuga aloaia o le faigapalota tele a Niu Sila, ma ua amata ai nei faatalanoaga a pati o le a osia faatasi ma le National le faigamalo lona 54.

Ae mai nisi o tagata suesue faapitoa o loo taumate e le o ausia e le National ma le ACT fuainumera e osia ai le isi faigamalo, ma o le a laua moomia ai pea Winston Peters ma lana NZ First.