O le asō e iloa ai le tonu pe aso malolo Niu Sila i le aso o toe sauniga o le Tupu Tamaitai, Queen Elizabeth II.

O Ausetalia o lea ua sau le faasalalauga o le a iai la latou aso malolo faapea foi i Peretania.

Ae ia Niu Sila, o lea ua faamautinoa mai e le ofisa o le Palemia, e oo mai i le taimi na tuufaatasia ai tala fou e lei iai se faaiuga a le malo ma o le fono a le Kapeneta i le asō e iloa ai le pe aso malolo pe leai.

I se saunoaga mai le taitai o le National, Christopher Luxon e tauala mai le sooupu, o loo lagolago e le pati le faia o se aso malolo e faaaloalo ai i le tuumalo o le Tupu Tamaitai.

Peitai, pe a tuu mai i le ACT ma lona taitai o David Seymour, o loo leai mai ma le tala o lea e faigata le tulaga o iai le tamaoaiga o Niu Sila ma o lona uiga o le isi foi lea $450 miliona gau mo pisinisi.

A o tālia ai la pe ono iai se aso malolo a Niu Sila e manatua ai le tuumalo o le Tupu Tamaitai, e pau le tala ua mautinoa e pei ona faailoa mai e le matagaluega a le Palemia ma le Kapeneta, o le a faatumauina pea le aso malolo ua taua o le Queens Birthday lea e faamanatu ia Iuni o tausaga taitasi, pau le suiga o le a taua o le King’s Birthday.