Ua faailoa e le alii Minisita o Tupe ia Lautimuia Afoa Uelese Vaai le tatau i le malo ona vaavaai toto’a i le mataupu, ma faataatia lelei se faavae o galuega, ma e lē laitiiti le taimi e fai ai, pe a faamatuu le paketi a le faamasinoga, ona e lē o se tulaga faigofie.
Sa faaalia le finagalo o le alii Minisita i le la talanoaga ma Tapuala o le EFKSTV i le polokalame o le Soalepule.
Na faailoa e Lautimuia o le faiga lea o loo faia ai e nisi atunuu e pei o Ausetalia, ma e oo mai i le taimi nei e lē o mapu faafitauli o loo feagai ai ma ia atunuu.
Ua faailoa foi o le tulaga lava lea i le vaaiga taulai a le Faigamalo mo le lumanai, ia maua le tutoatasi o le Faamasinoga, ua faamanino ai e le alii Minisita e faapea, afai o le tulaga lea lona uiga e tatau ona iai agavaa i le vaaia lelei o tupe, ma ia silafia o tupe nei o tupe a le atunuu lautele pe faamatuu atu pe leai foi, e fesiligia lava le malo o tulai i le faaaogāina.
O le isi itu afai e faia lea tulaga lona uiga e suia le tulafono ma faiga faavae, ma a tupu le tulaga lea e silasila le malo e ono oo atu i le tulaga e lē toe iai se Minisita o Faamasinoga, aemaise ai e ono faia suiga i le Tulafono Faavae.
