Na lūlū se mafui’e e 7.3 lona malosi i le fua mafui’e e latalata i motu o Vanuatu i le Vasa Pasefika, peita’i e le’i iai se lamatiaga o se tsunami na lapata’ia mai ai.
O le lipoti a le Radio New Zealand na ta’ua ai le lūlū o lea mafui’e i le tusa o le 9.45pm poo le toe kuata i le 10pm i le po o le Aso Gafua, o anapo lea.
Na ta’ua e le United States Geological Survey, na fuaina le loloto o lea mafui’e e tusa ma le 115 kilomita le loloto, ma na taia ai le tusa ma le 35 kilomita i le itu i Mātū i Sasa’e o Luganville, i Vanuatu.
E tusa ai ma lipoti a le Associated Press, e leai ni lipoti vave na iai o ni mea na faaleagaina poo ni galu malolosi e ono laga’ia ai se tsunami.
O lea sa toe faamautinoa mai ai e le vaega tutotonu i le Iunaite Setete o loo gafa ma le faaoo mai o ni lapata’iga mo ni tsunami e faapea, e leai ni lapata’iga o se tsunami, nisi tulaga lamatia, poo nisi lava mea na faaleagaina mai lea mafui’e, e aofia ai ma Niu Sila.
E oo mai le taimi o lenei lipoti, e lē o iloa pe na iai ni mea na faaleagaina mai lea mafui’e i nisi motu tau lalata ane.
Puna o Faamatalaga: https://www.stuff.co.nz/nz-news/360958213/magnitude-73-earthquake-strikes-near-vanuatu-islands-no-tsunami-threat
