O loo tumau pea ona ave le fautuaga a le auaunaga o le soifua maloloina i lo tatou atunuu o loo tatala pea le faitotoa mo soo se tagata e fai ai tui faaopoopo poo le booster mo puipuiga o le faamai Koviti-19, ina ua faailoa e lea auaunaga tāua le faamauina o gasegase fou e 13.
O le fuainumera lea na faamauina e le nofoaga tutotonu o galuega mo auaunaga mo faalavelave faafuasei i le matagaluega o le soifua maloloina i totonu o le fitu aso mai le aso 5 i le aso 12 o le masina lenei o Fepuari.
E le gata ina fautuaina le atunuu i le iai pea o le auaunaga a le soifua maloloina mo le faia o tuipuipui o le faamai koviti, ae o le fautuaga e faaaoga puni fofoga poo face mask pe afai o aafia i ni auga o le faamai o le flu.
I le faailoa ai e le soifua maloloina o le faaopoopoga o tagata i le atunuu ua maua i le Koviti-19, ua siitia ai nei le aofaiga o i latou i Samoa ua maua i auga o le faamai i le 16,414 talu mai le masina o Mati o le tausaga na tea nei 2022, na oo ai le faamai i le lautele o le atunuu.
