O le taulealea o Toese Tuuaga lea o loo nofo taofia i le vaaiga a leoleo i le falepuipui i Tanumalala ma o loo molia i le gaioiga sa ia umia ai se laau malosi e lē faatagaina i Samoa sa ia faapāpa i se feteena’iga sa tula’i mai i le malaevaalele i Faleolo i le masina o Mati o le tausaga nei.
O le lima masina talu ona taofia ua avea ma ona faasalaga i nisi o moliaga sa molia ai e leoleo i se isi matāupu.
O le Aso Lulu na oo atu ai o ia i le faamasinoga mo se faasalaga o moliaga o le faaoolima ma le lafo o upu faalumaluma sa ia ioeina ma faia ai le faasalaga e le afioga i le faamasino le afioga Leota Raymond Schuster.
O ona moliaga o le umia o se laau malosi e lē faatagaina, ma le faapāpā o le ‘au’upega o le a su’esu’eina i le isi vaiaso o muamua nei i le Faamasinoga Faaitumalo.
O loo masalomia foi e leoleo lea alii i se gaioiga solitulafono na faapāpā ai se laau malosi i se nofoaga o le nuu o Vailoa Faleata i le tausaga na te’a nei.
Ae o Toese e pei ona faailoa e leoleo sa tipoti ese ma Niu Sila ma toe aumai i Samoa ina ua mae’a ona tuli ni ona faasalaga i lea atunuu i ni solitulafono.
