Ua patipatia nei e sui o le Pasefika, ae o tagatānuu Samoa i se tala fiafia i le faamaonia ai o le avea o se tasi o alo o Samoa, ma loia faapitoa o le King’s Counsel (KC) o se faaeaea ua amana’ia ma ua oo mai ai faamanuiaga mo lea tamaita’i e pei ona molimauina i luga o upega tafa’ilagi.
E to’atele i latou a o sosaiete ma tagata ua faaalia lo latou agaga fiafia e ala ia latou tusitusiga, ua avea ai foi lea tamaita’i ma se tasi o tagatānuu i totonu o Aotearoa nei ma KC.
O Tiana Epati, o se tamaita’i Samoa o se loia e agavaa i tulafono faatonutonu, regulatory law, o matāupu i su’esu’ega tau soligatulafono tūgā criminal investigations aemaise i matāupu tau apili.
E tusa ai ma tala’aga o le ola a’oa’oina ma le olaga galue o Tiana, o le tama’ita’i o loo ia faaauauina le galuega a si ona tua’ā tamā le afioga A’eau Semi Epati, o le ulua’i Samoa ma se tagata Pasefika i totonu o Aotearoa nei na avea ma faamasino i le faamasinoga a Niu Sila.
Na faauu mai Tiana mai le Iunivesite o Aukilani, ma sa aloa’ia le avea o ia ma loia i le tausaga e 2000.
Na avea lea tama’ita’i ma pā’aga o le Rishworth, Wall & Mathieson, ma na amata faatino lava ana galuega tuto’atasi (barrister sole).
O ia foi sa avea ma peresitene o le New Zealand Law Society mai tausaga 2019-2022.
Faamauina le amana’ia o Tiana i le atunuu e tusa ai ma le tele o ana galuega lelei i le lio faaletulafono.
O Tiana Epati o se ulua’i tagatānuu mai le Pasefika ua umiaina lea tofiga maualuga.
O ia o se tasi o ia loia e 12 na filifilia mai le to’a selau ma le fitu na talosaga, ma o le umia e se loia o lea tulaga o se faailoga o lona ausia o se tomai maoa’e i galuega tau tulafono, poo le amana’ia ai o se tautua iloga i lea tomai faapitoa.
Puna o Faamatalaga: https://www.facebook.com/share/p/19gHkEUbty/f
