I le 20 tausaga talu ona faatino le faalapotopotoga o le Toomaga mo ē Puapuagatia i lo tatou atunuu poo le Samoa Victim Support Group, o se tasi o pine faamau o ia tausaga e tele o lana auaunaga o le avea o le masiofo a le Tupu o Salesa III o Kuini Camilla ma Faatinā poo le Patron o le faalapotopotoga.
O le faailogaina ai o le77 tausaga o le soifua o le Tupu o Peletania i le vaiaso ua mavae na faamauina ai o se tasi o faailoga tāua o ia tausaga e tele o lona soifua, o le avea o lana Masiofo ma Faatinā o le Toomaga mo ē Puapuagatia i Samoa.
Sa asia e Camilla le nofoaga o le Toomaga o loo faamautū ai fanau ua sauāina a o iai i Samoa ma le Tupu o Salesa ia Oketopa o le tausaga ua mavae, i le tatalaina o le fono a malo o le taupulega, ma le la ulua’i asiasiga taualoa i Samoa.
Ua momoli ai faamanuia mai le Pelesetene ma le faalapotopotoga o le Toomaga i le atoaga o le 77 tausaga o le soifua o le Tupu o Salesa ma momoli ai foi le faafetai i le Masiofo a le tupu ona o lona talia o le avea ma Faatinā o le Toomaga mo ē Puapuagatia i Samoa.
