Ua ave le fautuaga malosi a le Fofoga Fetalai o le Palemene le susuga Papalii Li’o Oloipola Ta’eu Masipa’u i le ta’ita’i o le itu faaupufai o loo agaia le malo, e tusa o sona finagalo ua ia faailoa ai le lē toe auai o sui faipule o le Itu Agai i komiti faapalemene o loo galulue ai.

Ua faailoa mai e Papalii ua tusi atu le susuga Tuilaepa L Sailele Malielegaoi ia te ia ma faailoa ai lea fuafuaga, ae ua ave iai lana tusi ma tali iai i le faamanatu i le ta’ita’i o le Itu Agai, o ia o se tasi o sui o le komisi a le Palemene ua latou ioeina galuega faataoto a le fono aoao faitulafono o lenei tausaga.

Ua fautuaina malosi ai e le Fofoga Fetalai le susuga Tuilaepa e lē talafeagai ma tulafono tumau o le Palemene lana faai’uga ma ua ta’u iai ma aulape o le lē auai o sui faipule i komiti faapalemene ua tofia iai.

O le tasi o vaega ua faailoa e Papalii o lana tuualalo i le susuga Tuilaepa o ia le isi sui matua ma sinia o le maota, e lē tatau ona tausolomua i le faia o se gaioiga faapea e fesiligia ai lona tausisia o le tautoga o le loto faamaoni, aemaise foi o sui mamalu o le itu o loo agaia le malo.

O le isi mataupu na fesiligia ai le Fofoga o le Fono, o le filifilia o se ta’ita’ifono o le komiti o tupe a le Palemene lea o loo avea ai ma sui ta’ita’ifono le tasi o faipule o le Itu Agai.

Faaalia e le Fofoga Fetalai e tatau ona atoa le iva o sui o lea komiti tāua ma o loo faatali se’i taunuu mai le malaga atu i fafo o le tasi o faipule o se sui o lea komiti ona faato’ā filifilia lea o se ta’ita’ifono.

O le sui faipule o Aleipata Itupa i Lalo sa avea ma ta’ita’ifono o le komiti o tupe, ae ua filifilia nei o se tasi o Minisita o le Kapeneta.

O le komiti lea e feagai ma le lipoiina o mataupu uma tau i fuafuaga tau tupe a le malo, aemaise lava pe a faataoto le tala faatatau autū o le tupe mo le tuuina atu e solaupule e le laulau a fono a le Palemene.