O taualumaga a le Palemene i le Aso Lua na te’a nei, e le’i mafai ona maimoaina i le alaata televise a le Malo ona ua titina e le kamupani e pulea faasalalauga digital i televise le Samoa Digital Communications Limited (SDCL).
Na titina le alaata i ni vaiaso na muamua ai a o le’i tauaofia le fono usu a le atunuu. O le mafuaaga lea o se tusi mai le Pule Faatonu poo le Regulator, na ave i le pulega o lea kamupani ina ia faaola le alaata poo le ono oo loa o le mataupu i le tulafono.
O aiaiga o le laisene na tuuina atu i le Samoa Digital Communications Limited, o loo aiaia ai le faaola o le alaata televise a le Malo, seia mautu se finagalo o le Kapeneta i le faatulagaina lelei o polokalame mo lana alaata.
O le lomiga a le nusipepa o le Sunday Samoan, o loo faailoa atu ai e le Pule Faatonu le afioga Lematua Gisa Purcell i lana tusi i le pule o lea kamupani tuma’oti le solia o aiaiga o le laisene ma ua oia ai ma tiute tauave o le Malo, o le mautali atu i le atunuu e ala i le talanoaina o mataupu i fonotaga a le Palemene e faasalalau i le alaata televise a le Malo.
O faasalalauga a le ofisa o le fono aoao i luga o le fesoota’iga televavave faaonapo nei i luga o le YouTube ma le Api o Foliga, faapea faasalalauga a le leitio a le Malo le 2AP, sa maua ai taualumaga o le fono a le Palemene i le Aso Lua ua mavae.
