E silia ma le ‘afa miliona lea ua su ai e le pulega a le Purex ana tagata faigaluega na tetee.
O tagata faigaluega nei a le Essity o loo i lalo o le Pulp and Paper Workers Union e lē gata ua tolu vaiaso e lē totogia ae o lea ua toe su e le kamupani e mafua ona vave amata le tetee mai le taimi na faasalalau e faia ai, ma ua soli ai maliega ma gau ai le pisinisi.
O le tetee a tagata faigaluega o loo i lalo o lea iuni ua mafua ona o loo latou finauina le sii o totogi ina ia tutusa ma le alu i luga o le tau o le soifuaga.
Ae mai le iuni o loo ia tuua’ia le Essity o loo taumafai e unai le $542,852 o tupe gau a le pisinisi ona o le vave amata o le tetee e totogi e le 67 tagata faigaluega ma le tala o latou e tatau ona totogia, ma ua faaalia ai e le iuni e lē o faigofie i tagata faigaluega o loo aafia lenei tala ua sau, e fai o le faitau vaiaso o leai ni totogi a o lea o le a toe ave i le Tulafono.
E foliga mai e lē vave maua se filemu i le va o le Essity ma le iuni o loo tu mo tagata galulue e lē o faamalieina.
