Ua toe tatala nei isi faitoto’a mo ni finagalo o le atunuu lautele e faaali ai ni o latou lagona ma finagalo, e faatatau i teuteuga o le faavae o le tausaga e 2020, ma teuteuga o le tulafono o Faamasinoga o Fanua ma Suafa o le tausaga lava lea e 2020.
Ua tatala lea avanoa i le atunuu ina ua pasia e le Palemene i lana taualumaga talu ai nei, le faitauga faalua o tulafono taufaaofi mo teuteuga o le tulafono faavae, ma le tulafono o Faamasinoga o Fanua ma Suafa 2020, ina ua mae’a ona fetufaaa’i ai finagalo o sui faipule o itumalo faapalota lea sa molimauina le tūtū aai o le ta’ita’i ma faipule o le Itu Agai e teena teuteuga, ae o le itu a le Malo o loo iai nofoa e 36 i le lagolagoina o teuteuga.
I se fingalo tusitusia o le ta’ita’i o le Itu Agai sa tuuina atu i faatonu o auala o faasalalauga eseese i le atunuu, o loo ia faamamafa ai le avea o ia teuteuga mai le itu a le Malo, ma avanoa e noatia ma aveesea ai le aiātatau to’atele o tagata e pei o alii ma faipule o nuu ma afioaga poo communal rights, pe afai ae pasia ia teuteuga o le faavae na pasia e le Palemene ia Tesema o le tausaga e 2020.
Peitai o loo teena i se finagalo tusitusia o le tamaitai Minisita o Faamasinoga, le tofa Matamua Vasati Sili Pulufana lea vaega o le finagalo o Tuilaepa, i sana tusi i le faatonu i le nusipepa o le Sunday Samoan.
O loo tali le minisita o faamasinoga i lea finagalo o le ta’ita’i o le Itu Agai ma ua faaalia e le Minisita o lea finagalo o Tuilaepa o loo ta’ita’i sese ai le atunuu ma e lē sa’o.
Faaalia e le tamaitai minisita o aiaiga o loo iai nei o le tulafono faavae e leai se vaega o faamamafa ai ni aiāto’atele poo communal rights.
O aiaiga o loo iai nei o le faavae o loo manino e pei ona faaalia e le minisita, o loo faatāua ai le aiātatau a tagata uma.
A mae’a ona toe iloilo e le komiti faapalemene ia teuteuga ma avanoa ai le atunuu lautele e faaali o latou finagalo, ona toe foi atu lea o teuteuga i le Palemene mo le toe soalaupuleina ma saili ai se finagalo i le lagolagoina poo le teena e ala i le faitauga faatolu.
Mo le silafia o soo se teuteuga o le tulafono faavae e manaomia ona pasia i le lua vaetolu o nofoa e 51 o le Palemene.
