O le Faamasinoga Faaitumalo i Mulinuu i le Aso Lua o le vaiaso nei na valaau ai se tagi a le auaunaga su’etusi ma tausi tusi a Su’a and Associates faasaga i le asosi o tusitala ma le aufaasalalau a Samoa le JAWS.
O se mataupu tau faamasinoga o loo molia ai foi le Peresitene o lea faalapotopotoga ua faavaeina faaletulafono, e mafua i le totogi o le auaunaga poo le pili na su’eina ai tusi a le asosi e lea ofisa su’etusi, ua savali nei i le 3 tausaga e lei totogia.
Ua faalua ona valaau le mataupu e na o le loia a le itu tagi, ma ua faaalia ai e se ofisa sinia o le faamasinoga ua toe foi le faila o le mataupu i le faamasinoga mo nisi o tapenaga faaletulafono, a o lei toe faatulaga se aso e valaau ai.
O se mataupu tau faamasinoga lenei e ta’ua o le civil case e lē o se tagi o ni moliaga tau solitulafono.
Peitai a alualu ae lē mafai ona totogi le pili o le auaunaga a lea pisinisi su’etusi, e iai le avanoa e faamalosia ai ona totogi e ala i se tusi saisai poo se warrant of committal.
E iai le talitonuga e 5 afe tala le pili a le itu na faauluina le tagi o loo mafua ai lenei mataupu tau faamasinoga faasaga i le Peresitene ma le asosi o le autusitala ma le aufaasalalau a Samoa.
O lea pili o le auaunaga su’etusi e mafua i le su’eina o faamatalaga tau tupe a le JAWS, auā lana lipoti o le tala o le tupe sa tuuina atu i le fono faaletausaga a le asosi na usuia i le tausaga e 2021.
Na maua le fesoota’iga i le Peresitene o le asosi ma ia faailoa mai ai ua matuā galo ia te ia ma lana laulau, ae o loo faia fesoota’iga ma le loia a le itu tagi mo se fetuuna’iga i se auala e totogi ai le pili.
