O loo tau sailia pea e leoleo ma fia malamalama i le mafuaaga o se tasi o faalavelave o loo latou suesueina nei lea o loo feta’ua’ina ai le ave faamalosia o se alii lea e faapea e lima aso na taofia ai ma faatigaina.
O Peter Vuong e 26 tausaga na maua atu i le po anapo i se fale tuufua i Belmore lea na ta’ua e leoleo o i na taofia ai ma faatigaina ma ua faailoa foi na aveesea ai nisi o ona oloa poo nifo, talu ona taofia mai i le Aso Tofi o le vaiaso talu ai.
E toaono alii ua pueina e leoleo ma molia i le faalavelave lenei ma e fai si ogaoga o tulaga o sauaga na faia i le mataupu lea, ma sa faaaoga ai auupega ma faatigaina ai sia alii.
E toatele leoleo na aofia i le suesuega e aofia ai ma leoleo nanā.
O loo ta’ua na ave faamalosia mai lenei alii faipisinisi i luma o lana uo tamaitai i lona fale i Smithfield e se kulupu o alii e toaono sa fai matapulepule ma ofu uli.
Ua ta’ua foi sa o latou faatonuina le tuuina ane o se tupe e 5 miliona ona faatoa faasaoloto ane lea o Vuong.
Fai mai leoleo o loo faaauau le suesuega i le auga tonu o lenei faalavelave ma o le asō na tutulai ai i latou ia i le faamasinoga.
