Ua molia e le WorkSafe le komiti faafoe a le aoga maualuga a Whangarei Boys High e tusa ma le maliu o le alii aoga lea na maliu a o alu se tasi o polokalame a tama na o ai i Abbey Caves.
O le masina lenei e atoa iai le tausaga talu ona maliu Karnin Petera, 15 tausaga le matua o lona soifua lea e lei mafai ona faasaoina mai ina ua pa le vai a o iai i totonu o le ana.
I le mae’a ai o suesuega a le WorkSafe ua faaulu ai nei moliaga e lua faasaga i le komiti faafoi a le kolisi i le Faamasinoga Faaitumalo a Whangarei ona o le lē faamalieina o itu tau le soifua maloloina faapea le saogalemu.
O moliaga ua faaulu e lē o faasagasaga i sui taitoatasi o le komiti faafoe peitai o le tino e tasi.
Ua sau ai ma le augani a le WorkSafe i komiti faafoe o aoga taitasi i totonu o Niu Sila e toe silasila i le saogalemu aemaise o le mautinoa o loo faamalieina mo polokalame nei e faia i fafo o potuaoga.
I se tusi na tauaao e mātua o le kolisi ananafi mai le puleaoga Karen Smith, o loo ta’ua ai o loo vaavaai nei i moliaga lea ua faia e le WorkSafe.
