Ua aga’i iuni o tagata faigaluega o care workers poo i latou o loo galulue mo le tausiga o tagata mama’i i o latou maota, e momoli le latou finau faaletulafono i le Health NZ, ua lē gafatia e nei tagata le taugatā ua iai nei le tau o le penisini, pe a fua i le mamao o nisi o a latou tagata mama’i e tatau ona oo atu iai e faatino le tausiga.
Ua faila faatasi e le asosi o tagata faigaluega le PSA ma le E tū se latou Employment Relations Authority claim e tetee atu i le vaega a le soifua mālōlōina, le health agency i le faavae e faapea, e solitulafono le faatonu atu e pule o galuega o le auala e faaaogā iai a latou tupe, semanū o lea e faatalitalia nei tagata faigaluega e totogi lava e latou penisini mo latou taavale ma isi tau mo le tausiga o taavale.
O loo faafiti mai le vaega a le soifua mālōlōina e lē o latou e faafaigaluegaina carers, e pei ona latou faailoa i le RNZ, o matāupu uma tau taavale o le matafaioi lena a vaega ia e (third-party) o loo latou faakonekarate mo le saunia o carers.
Ua to’atele nai tagata nei o loo galulue i lea matātā ua faigata ona oo atu i nofoaga mamao o loo iai tagata mama’i o loo latou tausia, ona ua lē gafatia le totogi o le penisini ua iai nei, o nisi ua faaitiitia o latou itula faigaluega, pe ua filifili e na o ma’i o loo nonofo latalata iai e mafai ona latou toe tausia.
Ua ta’ua i lea lipoti, ua tele tausaga o maualalo pea totogi o nai tagata faigaluega nei ma o le siitia ai o le tau o le penisini ua matuā telē ai lava le eseesega ma o latou totogi.
O le talosaga a iuni o nei tagata faigaluega, e lē o se matuā siitaga maualuga, ae ia aumai se totogi e talafeagai ma le tulaga o loo iai le faatinoga o a latou galuega.
A lē o lena, o le a amata loa ona lē toe talia le aga’i atu i ni tagata mama’i e mamao o latou nofoaga.
O le finau la lea ua aga’i atu iai le PSA ma le E tū o loo sa’ili ai se faalauiloaga mai le Employment Relations Authority e faapea, e lē o usita’ia e le Health NZ le tulafono e puipuia totogi o tagata faigaluega le Wages Protection Act, lea ua afaina ai le tusa ma le 23,000 support workers poo i latou o loo galulue i le tusiga o tagata mama’i i o latou aiga.
O le taimi nei e tusa ma le lipoti, o loo iloiloina e le Health New Zealand faatulagana o le faatupeina o ana auaunaga mo le 2026 i le 2027, e aofia ai le aafiaga ua iai le siitia o tau o le penisini, i auaunaga nei o loo saunia tagata mo nei galuega poo third party providers.
Puna o Faamatalaga: https://www.rnz.co.nz/news/national/591069/care-workers-unions-take-health-nz-to-court-over-travel-costs-as-petrol-prices-soar
