O le tauaofiaga o sosoo ai nei a le Palemene e pei ona faatulaga mo le aso 18 o le masina fou o Oketopa, o le a avanoa ai le sui faipule o Lepa ma le faipule o Faleata 3, e tuuina atu so la finagalo i le togisala sa fautuaina e le komiti o amioga ma tulaga mamalu a le Palemene, e pei ona avea ma lape i le fautuaga e faamalolo le tumau seia iai se aso, lea sa mafua ai ona faia le faaiuga a le faamasinoga sili, e faamuta lea faasalaga sa talia e le Fono Aoao, ona ua oia aiātatau o ia sui faipule ina ua le maua se avanoa e tali atu ai i le togisala.
Ua faailoa le maua o lea avanoa i se finagalo tusitusia o le afioga i le Fofoga Fetalai susuga Papalii Oloipola Taeu Masipa’u, na tuuina atu i le komiti o amioga ma tulaga mamalu a le Palemene i le vaiaso nei.
Ua fautuaina ai le toe fono o le komiti e silasila i le latou suesuega e mafua i le faaiuga a le faamasinoga ua faailoa ai se lape, ina ua lu’i e Tuilaepa Lupesoliai Sailele Malielegaoi ma Lealailepule Rimoni Aiafi le faaiuga na faamalolo le tumau ai seia iai se aso, lea na faamuta e le faamasinoga le togisala ae toe foi le mataupu i le Palemene.
E iai le talitonuga o le Fofoga Fetalai o le lape i le faagasologa o suesuega ma sailiiliga a le komiti i le aafia o aiātatau o sui faipule, o se galuega i lana silasila e tatau ai i le komiti ona faamae’a ma toe tuuina atu i le Fono Aoao.
O se finagalo o le taitai o le Itu agai ma le vaega faaupufai e puipuia aiātatau a tagata i fesootaiga faaonapo nei mai le ofisa tutotonu o lea pati faaupufai, ua fesiligia ai e le susuga Tuilaepa le mafuaaga o le toe fono o le komiti o amioga taualoa ma tulaga mamalu a le Palemene.
