Ua avanoa nei ona fai paaga Samoa e ala i le kamupani vaalele a le atunuu le Samoa Airways, ma kamupani vaalele e 4 a se tasi o atunuu Arapi le United Arab Emirates poo le U.A.E. Ua avanoa foi ona fai paaga ma le kamupani tele a lea atunuu le United Emirates Airline.
Ua faailoa lea laasaga tāua i le lumanai o faiga faapisinisi tau vaalele sivili a Samoa ma lea Malo, ina ua faamautu ai le maliega ua mae’a sainia e le Minisita o Galuega tetele ma vaalele sivili le tofa Olo Afoa Fiti Vaai, ma le Minisita o galuega tau vaalele sivili a lea Malo, ina ua mae’a le fonotaga faavaomalo tau vaalele sivili sa usuia i le atunuu o Kanata i le lua vaiaso ua mavae.
Ua faailoa i se pepa o faamatalaga mai le Matagaluega o Galuega Tetele ma Fela’ua’iga a Samoa, o lea maliega o le a mafai ai e vaalele o atunuu e lua ona femalaga a’i aemaise o le mafai ai foi ona fausia ni faiga paaga mo pasese poo tagata malaga e faaaogaina auaunaga tau vaalele a Samoa ma lea Malo Arapi.
O ia foi faiga paaga e avanoa ai Samoa ona faalautele le tautua a le Samoa Airways i isi kamupani vaalele o le lalolagi o loo fai paaga ma kamupani vaalele a lea atunuu.
O le tapenaga la ua taoto ai le avanoa o Samoa ma lana kamupani vaalele e saofaga ai e faaaoga lea maliega, o le saili o sona vaalele e faatinoina malaga faavaomalo i atunuu i fafo, e ese mai malaga faavaomalo o loo faia e vaalele laiti o le Samoa Airways.
