Ua avanoa nei le tofiga o le Komesina o le ofisa o le toe fuataina o tulafono le Samoa Law Reform Commission, ona ua faamavae le sa avea ma faauluuluga le faletua le susuga Telei’ai Dr Lalotoa Mulitalo Seumanutafa.
Ua faalua ona filifilia o ia e avea ma faauluuluga o lea auaunaga taua a le Malo o Samoa ma o le tausaga e 2020 ile maea o lana 3 tausaga muamua na toe filifilia ai.
O ia le tamaitai lona tolu o le atunuu ua tauaveina lea tofiga talu ona faavaeina le ofisa o le komisi o le toe fuataina o tulafono ile tausaga e 2008. O le aso Lua o le vaiaso nei na maea ai le taimi galue o Telei’ai Dr Lalotoa e tusa o lana faamavaega sa tuuina atu ile Komisi e pulea tagata faigaluega a le Malo ile fa vaiaso ua tuanai.
O ia o se tamaitai loia faauuina ma e tele nisi o auaunaga a le Malo sa galue muamua ai, ao lei filifilia e avea ma faauluuluga o le ofisa o le komisi mo le toe fuataina o tulafono a Samoa.
