Ua faamatuu mai nei e leoleo le igoa ma le ata o le tagata lea latou te talitonuina sa ia tafanaina tagata e to’atolu na maliliu i le aso ananafi i le setete o Niu Sa Uelese.
Ua faailoa i lipoti a le 9News o loo feta’ua’ina e aiga lea tagata i ē ua maliliu.
O Julian Ingram e iloa foi i lona igoa o Pierpoint o loo mana’omia nei ma sa’ilia e leoleo i se poloa’iga e faatatau i ona moliaga o le fasioti tagata.
Na valaau ane le fesoasoani faavavave i se fale i Bokhara Street i Lake Cargelligo poo le ‘afa o le 4 i le afiafi ananafi.
Na maua atu iai e leoleo se tama’ita’i e 25 tausaga le matua ma se alii e 32 tausaga le matua i totonu o se taavale o loo iai manu’aga mai se fana, na faia iai togafitiga peita’i na maliliu ai lava i lea nofoaga.
Na toe o ane leoleo i se isi foi faalavelave i le taulaga lava lea ae i le magāala o Walker.
Na maua atu iai se tama’ita’i e 50 tausaga ma se alii e 19 tausaga o loo manunu’a foi mai se fana i le driveway o se fale.
Na maliu le tama’ita’i mulimuli ane peita’i o le 19 tausaga le matua na ave atu i le falema’i ma o loo tigāina ai.
O le faamatalaga a le Sui Komesina o leoleo i Niu Sa Uelese ua ta’ua ai, e talitonu o le alii o loo sa’ilia o loo faa’au’upegaina ma e ao ona faaeteete iai.
O le faalavelave e foliga o se matāupu faaleaiga ma e foliga e aiga uma i latou ua aafia i lenei faalavelave.
O loo faamatalaina le alii o loo sa’ilia o se apoliki na mulimuli vaaia o loo ia aveina se taavale o le ituaiga o le Ford Ranger ma o loo talosagaina tagata ia vave ona logo leoleo pe a vaaia i soo se nofoaga.
Puna o Faamatalaga: https://www.9news.com.au/national/lake-cargelligo-shooting-three-people-killed-manhunt-underway/ec84a093-faf6-4095-b8f8-93990bf18605
