O le asō lea ua faailoa e ta’ita’i o tagata Isaraelu i Ausetalia o le a o latou faaopoopo atu ai i le finauga faaletulafono faasaga i savali e lagolagoina Palesitina o loo faia i le Sydney Opera House.
O le asō foi ua atoa ai le lua tausaga talu le osofa’iga a le Hamas ia Isaraelu.
Ua faailoa e le 9News o le savali ua fuafuaina i le Aso Sa o lumana’i nei ae o loo fautuaina e leoleo ia ‘alofia le toe alia’e mai o vaaiga na iai i le 2023 lea na susunuina ai fu’a i lumāmaota o le Opera House.
Ta’ua i le lipoti o le a tuuina atu le finauga a le NSW Jewish Board of Deputies i le Faamasinoga Maualuga ina ia suia le auala o loo fuafua e faaui ane ai lea solo tetee, fai mai a latou ua silia ma le lua tausaga o faia pea faapotopotoga ma savali a tagata e tetee ia Isaraelu aemaise lava i le taulaga ma ua tau lē uia e tagata Isaraelu.
Fai mai kulupu e lagolagoina Palesitina o le a o latou tetee atu i ni finauga faaletulafono e tuu ane e leoleo a Niu Sa Uelese e suia ai le auala e ui ai le latou solo tetee.
I Melepone ua faailoa le tetee atu o le Premier o Vitoria, Jacinta Allen i se isi foi savali o loo faia i le asō i le ogatotonu o Melepone, e tagata e lagolago ia Palesitina.
O le aso 7 o Oketopa 2023 na amata ai le vevesi ina ua fasiotia e le ‘autau a le Hamas tagata e 1,200 ma ave faapagota tagata Isaraelu e 250 lea na afua ai le osofa’ia e Isaraelu o Gaza ma ua tele soifua ua ma’umau ai.
Saunoa le Palemia o Ausetalia o le asō e lē tatau ona avea o se aso mo ni solo tetee ma ni faaaliga finagalo, o se matua’i lē faaaloalo pe afai e faatino pea ia ituaiga gaioiga.
Puna o Faamatalaga: https://www.9news.com.au/national/pro-palestine-protest-at-sydney-opera-house-opposed-in-court/19b8b306-27ba-44e5-a94a-835e7e859261
