O loo faailogaina i le lalolagi i le asō le aso faapitoa mo le itupa o alii, le International Men’s Day e pei foi ona faia i Ausetalia.
O le faamoemoe o lenei taumafaiga ina ia una’ia ai le itupa o alii e faasoa ma talanoa ma isi e uiga i le soifuaga ae lē gata i lea o lu’itau ma soo se matāupu e fia faasoa ai, e fai ma faamāmā avega ma fesoasoani a o alu pea le savaliga i lenei soifuaga.
O le Pacific Island Mt Druitt Action Network lea e faapuupuu o le PIMDAN na faamanatuina foi lea aso tāua e ala i le ofoina o le avanoa i soo se alii, e feiloa’i ai i le nofoaga mo talavou, le Emerton Youth Recreational Centre e talatalanoa ai ma faasoa.
O le PIMDAN na faatūina i le 2003 e saunia ai avanoa mo tagata Pasefika e maua ai se fesoasoani mai auaunaga eseese e mafai ona fesoasoani i o latou mana’oga i aso ta’itasi.
O loo faauluulu la i le faafeagaiga o se tamālii Samoa foi, Albert Tevita ma e lē pau lea o sa latou polokalame o loo fesoasoani ai i le komiuniti.
O le autū faatāua i Ausetalia i lenei tausaga mo lenei aso faapitoa, Because Silence isn’t strength..o le naunauta’iga ia faatalanoa ni faafitauli a o ni aafiaga foi o aofia ai le itupa o alii ina ia lelei mafutaga ma aiga, nuu ma ekalesia faapea komiuniti.
