O tagata asiasi atu i Samoa mai Niu Sila o loo maualuga lona aofaiga e pei ona faamauina i le uluai tolu masina muamua o lenei tausaga.
O faamaumauga ua faalauiloa e le Samoa Visitors Bureau ua ta’ua ai ua siitia i le 20 pasene le aofai o tagata malaga asiasi atu i le atunuu.
Ua faailoa e silia ma le 40 afe tagata na taunuu atu i Samoa i le uluai tolu masina o le tausaga nei ma i le piliota lea o loo maualuga ai lava le aofai o tagata asiasi mai Niu Sila.
O loo faailoa i faamaumauga faamauina o le aofai o tagata mai Niu Sila na malaga asiasi i Samoa i le piliota lea e tusa ma le 46.1 pasene o tagata na malaga atu, e tusa lea ma le 13,886 o tagata asiasi i Samoa.
Ua maitauina foi i lenei vaitau le amata gasolo o fonotaga a ekalesia ma tapuaiga eseese i Samoa ma e le taumate e ono sili atu le aofaiga o tagata asiasi i Samoa i le isi tolu masina e faamae’a i le faaiuga o le masina nei nai lo le aofai e pei ona faamauina i le uluai tolu masina o le 2023.
