O le masina o Aokuso o le tausaga nei o le a faia ai se faaaliga o nisi o measina a Samoa e pei ona tapena iai le Iunivesite Aoao o Samoa i le vaega o le nofoaga tutotonu o a’oa’oga i le tatou gagana, o tu ma aganuu.
O se tasi o falemataaga i le atunuu o Siamani o loo faalauiloa ai nisi o a tatou measina e pei o le ie Șamoa mao’i, ma o le falemataaga foi lea o loo teu ai ma nisi o a tatou auupega o taua anamua e pei o uatogi ma talavalu sa ta mai laau o le tatou vaomatua i le taimi o le 1840 ma tua atu.
O lea ua toe taliu mai i Samoa le faatonu o le laumua o suesuega o mataupu tau Samoa le tofa Ta’iao Matiu Dr Matavai Tautunu ma nisi o lana aumalaga o sui o le laumua, sa malaga i Siamani e faia feutanaiga ma tapenaga mo le aumaia o nisi o ia measina a le atunuu mo le faaaliga ia Aokuso poo se Art Exhibition.
O nisi o auupega o taua o le a aumai ai o loo tau sailia lo latou ta’uga ma lo latou faaaogāina, ona e oo mai i le taimi nei ua leai ni faamaumauga e toe iloa ai.
Faaalia e le Faatonu o le laumua o suesuega o mataupu tau Samoa i le Iunivesite Aoao a Samoa, o le tāua o le faaaliga o le a faia e toe silasila ai le atunuu aemaise o tupulaga i nisi o a tatou measina ua lē toe maua i nei aso.
O le faamoemoe o measina e aofia ai aupega o taua anamua o le a aumai mai Siamani, o le toe faafoi pe a mae’a le 3 tausaga o le a faagasolo ai lea faaaliga i totonu o le falemataaga o le Iunivesite Aoao a le atunuu.
