Ua auai atu nei sui o le Vaega o Puipuiga a Niu Sila – New Zealand Defence Force (NZDF) mo se galuega tele – e fesoasoani atu ai i Malo Aufaatasi ma a latou taumafaiga i le māta’itūina o gaioiga ma ta’iala ua faatūina mo Korea i Mātū (sanctions monitoring); e lē gata i lea ae ua faamauina foi le auai ai o le NZDF mo se polokalame tau militeri faavaomalo.
Faamauina o se taimi muamua lea o le a auai ai le vaaleletau – Royal New Zealand Air Force P-8A Poseidon i se polokalame e aofia ai ma isi atunuu.
I se pepa o faamatalaga a le vaega o puipuiga, o loo ta’ua ai e 20 vaatau ma le 20 vaaleletau a Niu Sila o loo auai i lea polokalame, lea e aofia ai Iapani, Amerika, Ausetalia, Kanata ma Farani.
O se polokalame ua manatu e saga faamausalī ai le galulue faatasi o paaga nei i tulaga o le puipuiamalu o o latou ogasami ma atunuu.
Faamaonia i le mae’a ai o lea polokalame, o le a iai pea le Poseidon i Iapani e fesoasoani e māta’itūina ia ogasami, ma taofia le tele o fela’ua’iga faasolitulafono i le va o vaa, ia mautinoa o loo savalia pea aiaiga ma ta’iala a Malo Aufaatasi.
Faailo foi le aga’i atu o le HMNZS Aotearoa ma se helikopa – Seasprite helicopter, e faaauau ana galuega faatino o le māta’itūina o ogasami ma tali atu e ala i le avatu o tiso o vaa.
O le a faimalaga atu foi lea vaa e asia Vietnam ma Filipaina e tusa ai foi ma galuega soofaatasi ae o le maliega faavaomalo o atunuu ua mae’a sainia mo puipuiga o le ogasami o Initia ma le Pasefika (Indo-Pacific).
Puna o Faamatalaga: https://www.nzdf.mil.nz/media-centre/news/nzdf-ship-and-aircraft-deploy-to-indo-pacific-region-for-operations-and-exercises/
