O Samoa le isi atunuu o le Pasefika sa auai le sui o lona malo i se faatasiga tāua sa faia i luga o se manuao o le fitafita o le sami o le malo o Ausetalia, e sami ai le faai’uina o se a’oa’oga tuufaatasi a auaunaga faafitafita o le sami a le Pasefika, ma sami ai ma le atoaga o le 125 tausaga o le fitafita o le sami a lea malo tele o se paaga totino a Samoa.
O le tama’ita’i Minisita o Tupe o se tasi o Sui Palemia, le afioga Mulipola Anarosa Ale Molioo sa fai ma sui o le malo o Samoa i lea sauniga tāua a le fitafita o le sami a Ausetalia.
O lea sauniga e pei ona faailoa i se faasalalauga mai le ofisa sooupu a lo tatou malo, o se vaega o a’oa’oga mo fitafita o le sami a lea malo e auai ma atunuu e 18 e aofia ai ma Samoa.
E faaigoaina lea a’oa’oga o le Exercise Kakadu Fleet Review 2026 ma e ta’ilua tausaga ma faatino.
O lea faatasiga e pei ona faailoa i le faasalalauga na faafetai ai le tama’ita’i Sui Palemia i le avanoa sa feiloa’i ai ma le kapeteni o le vaaleoleo o le Nafanua 3 ma faailoa ai se lipoti mai le alii kapeteni le susuga Muaauotaua Amosa ma le pulega o le vaaleoleo o se foa’i a le malo o Ausetalia.
E to’a 23 le auvaa o le Nafanua o loo auai i lea a’oa’oga.
O le sauniga sa auai le sui o le malo o Samoa sa maua ai le avanoa o le Sui Palemia e feiloa’i atu i le tama’ita’i Kovana Sili o lea malo.
