O le toe tatala o tuaoi o atunuu i faigamalaga masani, ma toe fegasoloa’i ai ma tulisi poo tagata tafafao e faaalu a latou tupe e faimalologa ma tafafao ai i atunuu eseese o le lalolagi, ua toe faaiila ai taumafaiga a le Pulega o Tagata Tafafao mai i Samoa, e auai i faaaliga o le atina’e o tulisi e faalauiloa ai Samoa i le lalolagi.

O le vaiaso nei ua faagasolo ai le faaaliga tele faavaomalo i Los Angeles i Amerika ua ta’ua o le Travel and Adventure show o loo auai ma se aumalaga a le pulega o tagata tafafao, o loo latou faalauiloa lo tatou atunuu i lea faaaliga tele.

O le faatoa toe faia lea o le faaaliga o loo auai atunuu eseese o le Pasefika e pei Samoa i le faamoemoe maualuga, e faaaoga le avanoa tāua e maketi ai Samoa i auaunaga tau tagata tafafao e pei o kamupani vaalele, o kamupani vaa o loo gafa ma le tapenaina o faigamalaga a meli tetele e tafafao ai turisi ma afea atunuu e pei o Samoa. 

Ua faaopoopo i lea faamoemoe nisi o tamafanau a le atunuu ua lauiloa i faafiafiaga e pei o nisi sui pepese se toalua mai le Punialavaa, ma le susuga Asuelu Pulaa o le 90 Days Fiancé Show e faatosina ane iai tagata tafafao, ma iloa ai auaunaga tau tulisi o loo ofoina e lo tatou atunuu ma fuafua mai ai ni tafaoga e faaalu ai a latou tupe e nonofo i faletalimalo ma faaaoga isi auaunaga e fesootai i le atinae o tulisi.

O loo taitaia le aumalaga a le pulega o tagata tafafao e se ofisa sinia o le pulega i le vaega o maketi, le tamaitai o Poinsettia Taefu.

Ua fetaui lelei lea faaaliga o loo auai lo tatou atunuu, ma le malaga atu o le tatou aulakapi taitoafitu mo le vae o le taamilosaga i LA poo Los Angeles i Amerika.