O se tasi o Kolisi maualuga a le Ekalesia Katoliko le Kolisi o Sanele i Moamoa, e 6 iai aoga ua auai nei i le unaia poo le faalauiloa ina ia taofia sauaga o loo tulai mai i totonu o aiga faapea le atunuu.
O se polokalame o loo taulamua ai le faalapotopotoga a le Toomaga mo ē Puapuagatia e tauala mai i le fesoasoani a le Malo o lea ua vaaia ai le toatele o faalapotopotoga faapea aoga ma afioaga ua auai ai ina ia taofia le tulai mai o nei sauaga i totonu o aiga, nuu faapea le atunuu.
O polokalame a le Kolisi o Sanele ua faatāua ai se taiala e faaupuina faapea “Let go and Let God Heal”. O se feau o loo faatāua ai fanau aoga ma fanau laiti o loo sauaina i le itu faalemafaufau poo le trauma and mental health.
O le sao a le Kolisi o Sanele o se vaega lea o le 16 aso o loo faatāua ai le tetee atu i sauaga i le lalolagi atoa.
O isi aoga e 5 lea e atoa iai le 6 o kolisi o loo auai i lea polokalame e aofia ai le Kolisi o Maluafou, Kolisi o Levaula, Seventh Day Adventist School, Aoga Matataeseese a le Don Bosco i Alafua ma le Kolisi o Tuasivi i Savaii.
Na faailoa e le Peresetene o le SVSG ia Siliniu Lina Chang le tāua o le auai o fanau aoga aemaise lava alii i lenei polokalame ma avea ai ma faataitaiga i le tele o tupulaga talavou ina ia tutū faatasi e tetee atu i sauaga faasaga i tina ma tamaitai faapea fanau.
