O taualumaga faaiu a le Fono Aoao Faitulafono o le a amatalia i le Aso Lua o lenei vaiaso, o le a auai sui faipule e toatolu ua faamavae ma le pati faaupufai e puipuia aiātatau a tagata.

Ua faamaonia mai lea tulaga e le afioga i le fofoga fetalai susuga Papalii Li’o Oloipola Ta’eu Masipa’u, i le tuanai o se finagalo o le sui taitai o lea vaega faaupufai na ia faailoa ai e le tatau ona auai le tofa Ale Vena Ale, Tuu’u Anasii Leota, ma Mau’u Siaosi Pu’epu’emai i taualumaga a le Palemene i le aso 20 o Tesema, ona ua avanoa o latou nofoa ina ua faamavae ma le pati faaupufai sa lagoago ma lesitala ai o latou suafa.

O taualumaga a le palemene i le vaiaso nei, o le a faailoa ai e le fofoga fetalai lana faaiuga i faamavaega a ia sui faipule mai le faafaletui a le vaega e puipuia aiātatau a tagata, ma ua mae’a foi ona faia moliaga o faipule e tusa o aiaiga o le faavae ma le tulafono o faigapalota e faasino i le faamavae ose faipule mai lana vaega faaupufai.

O lenei mataupu ua iai le talitonuga o le a tuuina atu i le faamasinoga maualuga mo se iloiloga faaletulafono ma faia iai se faaiuga mulimuli.

Ae i galuega faaiu a le Fono Aoao Faitulafono mo lenei tausaga e tolu ni tulafono tau faaofi o le a tuuina atu i luma o le laulau a fono.

O le tulafono taufaaofi o le teuteuga o le Tulafono o le Faasologa o Tiute 2022, Tulafono Tau Faaofi o Teuteuga o le Tulafono o Fanua ma Suafa 2022, ma le Tulafono Taufaaofi o le faatatauina o tupe faaopoopo.

O le tulafono taufaaofi o teuteuga o le tulafono o fanua ma suafa o le a tagofia i se tulaga faanatinati, ona o teuteuga ia e tatau ona pasia e mafai ona faagasolo ai galuega a lea faamasinoga i aiaiga o le tulafono fou na pasia ia Tesema o le tausaga e 2020.

O teuteuga foi ia o le a mafai ai ona faatino le filifilia o Faamasino mo galuega a lea faamasinoga, o se tasi lea o to’a na mafua ai ona taatia galuega masani i le tagofia o mataupu a lea faamasinoga i ona tulaga masani.