O Tupu ma sui o aigatupu, o Peresitene, Palemia, ma faauluuluga o le tele o atunuu o le lalolagi ua faamoemoe e malaga e auai i toe sauniga faalemalo o lana Maiesetete le Tupu Tamaitai o Peretania o Elisapeta II, e faia i le Aso Gafua o le vaiaso fou ae o le Aso Lua lea i nisi o atunuu o le lalolagi e aofia ai ma Samoa.
O le auai atu o le afioga i le Ao Mamalu o le Malo o Samoa le afioga Tuimalealiifano Vaaleto’a Sualauvi II, ma lana Masiofo le afioga Faamausili Leinafo Tuimalealiifano, na faamaonia mai e se Minisita o le Kapeneta lea faaiuga a o lei tuua le atunuu i le po anapo, o le Aso Lua, 13 Setema 2022.
O le aumalaga a le Ao Mamalu o le Malo ma lana masiofo ua aofia ai se Malu o le Malo o se leoleo faafeao mo lana afioga, o se ofisa sinia o le va i fafo ma le failautusi a le Kapeneta, o le Ofisa Sili foi lea a le pulega o le Matagaluega a le Palemia ma le Kapeneta.
O le tausaga e 1981 ua faamauina i talafaasolopito o le Malo o Samoa talu ona Tutoatasi, na uluai afio ai sona Ao o le Malo i se sauniga tele i Peretania i se valaau faaaloalo a le Aiga Tupu o lea Malo, lea na malaga ai le susuga i le Tapaau Faasisina Malietoa Tanumafili II, e auai i le sauniga o le faaipoipoga a Perenise Salesa lea ua faalupe nei o le Tupu o Salesa III poo King Charles III.
O lea foi la ua avea ai le Tupu o Salesa III ma Faa-Ao o Malo o le Taupulega ina ua tuumalo lona tuaa tina sa avea ma Tupu ma Faa-Ao o lea faatasiga o Malo o le lalolagi ua aofia ai ma lo tatou atunuu ma o Samoa o le a usuia ai le isi fono tele a Malo o le Taupulega i le tausaga e 2024.
O le afioga i le Ao Mamalu o le tatou Malo ma le Tupu o le Malo o Tonga ma a la Masiofo o nisi ia o faatumutumuga o Malo o le Pasefika o le a auai i toe sauniga o le tuumalo o le Tupu Tamaitai o Peretania.
