Ua faailoa e le Minisita o le Soifua Maloloina i le Palemene ao tauaofia i le vaiaso nei e lei lava tapena Samoa o le faama’i lea ua aafia ai le tamaoaiga o atunuu ma maumau ai soifua o le tele o tagata i le lalolagi .

Na afea i le tali a le Minisita o le Soifua Maloloina i saunoaga faalauaitele o le tala faaopoopo muamua o le tupe lea ua pasia fesili agai i le tulaga o feagai ai le Mālō ma tapenaga o puipuiga o le koviti19 ma nisi faipule na latou faitioina  isi o tapenaga e pei o le tapunia atoa o Samoa mo na’o le vaiaso e tasi ina ua maua i suega faalesoifua Maloloina nisi ua aafia i le siama e pei o tausi soifua ma se vaega o le pasese mai Ausetalia.

Na saunoa le Minisita le afioga Valasi Luapitofanua Tafito Selesele o le taimi lenei o le galulue faatasi ae leo le tusitusi lima poo ai ua sa’o ao ai ua sasi i lana faautautaga. Na ia faatepa foi le Palemene i le galulue punouai o auaunaga eseese a le Mālō aemaise o le Soifua Maloloina i le faatinoina lea o galuega uma o puipuiga

“Ua tele tala ua alu, tele faamatalaga fetolofi a’e i luga o api o foliga (Facebook) ua tuuaia le Matagaluega o le Soifua Maloloina , ua tuuaia le Minisita, ua tuuaia le Mālō, tala a le tagata ata mai aua tatou te tusitusi lima, aua tatou te tuuaia se tasi ae tatou galuegaina le faafitauli”.

Taua foi e Valasi e le’o se galuega faigofie ae o leo mapu le aufaigaluega a le Soifua Maloloina e ala i puipuia lea o le atunuu.

O loo tumau pea le aofaiga o i latou ua aafia i le

Koviti i nofoaga faanofoesea faatasi ai ma tausi soifua i le to’a 31 ma o loo faaauau pea suega poo test mo puipuiga mai le lautele o le atunuu.