Ua talosaga mai leoleo i tagata e aua ne’i toe faasoaina le ata video o loo faailoa ai se tasi o tamaitai talavou o loo faaoolima iai le isi toalua i Aukilani i Saute.
I lea ata video o loo faailoa i ripoti a le Herald e le o mafai ona faailoa le faaiuga o lea faaoogalima ona o le matuia tele, ma e faapea o loo faalogoina ai le alaga tigaina o lē na aafia.
O fafo ane o le lotoa a le Pukekohe North Primary lea na tupu ai ma ua faamaonia mai e le pule aoga a le Pukekohe High School, Richard Barnett faapea le aoga tulaga lua i lea pitonuu, e le ni talavou poo ni tamaitai aoga mai ia latou aoga.
Ae i molimau a se tasi o puleaoga, e talitonu o ni tamaitai e aooga i nisi aoga i totonu lava o lo latou pitonuu.
O loo faaaoga nei e leoleo lea ata video e sailia ai i latou na aafia i le fusuaga, atoa ai ma le faatalanoa o faalapotopotoga e gafa ma le faatalanoaina o mataupu faapenei i tua i le komiuniti.
