Ua toe faailoa e le pulega o le kamupani vaalele a le atunuu le Samoa Airways atugaluga ma popolega i le ono telē o se aafiaga o lana auaunaga ma le tautua e mafua mai i se isi o tuua’iga e lē sa’o a Mau Hunt, sa ia faasalalau ai i lana polokalame i luga o fesoota’iga faatekonolosi le social media e faapea e iai sea poo shares o le Ofisa Sili o le Samoa Airways le susuga Tauā Fatu Tielu i le kamupani vaalele o le Talofa Airways, ae o loo galue o le Pule o le Samoa Airways.
E iai le talitonuga o lea tuua’iga e mafua mai i le totogi e le Samoa Airways o le tautua a le Talofa Airways mo le aveina o ana pasese i le Aso Lulu o le vaiaso ua mavae, ina ua taofia uma malaga a ona vaalele ona o le tulaga i su’ega poo test na maua ai nisi o lana aufaigaluega ua tagofia le avamalosi ma fualaau faasaina, ma se pailate na ia tagofia fuālaau moe.
O loo teena foi e le kamupani vaalele le aumai o se pusa maliu i sana malaga mai Amerika Samoa na fafao mai ai ni fuālaau faasāina.
Faaalia e le pulega o le Samoa Airways o loo tapena sana tagi o le faia o tuua’iga taufaaleaga, e ese ai ma le tagi ua faaulu i leoleo.
I se faatalanoaga ma le susuga Mau Hunt o loo tuua’ia i lona fai o ia faasalalauga sese, na ia faailoa mai ai o le aiātatau a le kamupani vaalele le ave o le mataupu i leoleo ae ua nofo sauni foi e tali i ni moliaga.
Ua fautuaina e le kamupani vaalele a Samoa i latou sa mauaina ia faasalalauga ia aua ne’i o latou talitonuina ona e sese ma lē sa’o.
