Ua faaleo atugaluga o le faamasinoga maualuga i le tulaga faatupulaia pea ua iai soligatulafono o sauaga matagā e aafia ai fanau teine.
O le maitau a le Faamasinoga i mataupu o loo faato’ai atu e aupito taatele sauaga e toe faia lava e tagata o se aiga i so latou afafine ma o se tulaga matuia tele le faia e se tasi e aupito sili ona latalata o se aiga se tulaga faapea i so latou lava tagata.
O le vaiaso nei i le Faamasinoga Maualuga na saunoa ai le Tamaitai Sui Faamasino Sili e lē talia e le faamasinoga ia ituaiga solitulafono, na faia ia saunoaga ina ua tolaulau le faaiuga o se tasi o alii 55 tausaga le matua ina ua ia toe faia uiga matagā i le afafine o lona uso e 11 tausaga le matua.
O se mataupu na tulai mai ia Oketopa o le tausaga 2021 ma ua falepuipui ai lea na molia.
Saunoa Niava Mata Tuatagaloa ua lē malu fanau teine i o latou aiga.
Ae o le amataga foi o le vaiaso nei lea na valaau ai luma o le faamasinoga se mataupu o loo molia ai se alii, faapea le tamā o lona tamā 74 tausaga le matua ma se tasi tama o le faauo a le aiga lea i lo latou faia o ni faigaaiga fai faamalosi i lona lava afafine amata mai a o faatoa 5 tausaga o le teineitiiti.
Saunoa manino Tuatagaloa e lē faavaivai ai le Faamasinoga e tuuina atu faasalaga faafalepuipui ia faailoa atu ai i alii nei e lē faavaivai ma e lē talia e le faamasinoga ituaiga uiga faapea.
