Ua atoa nei le to’atolu o sui o le Fono a Sui Tofia ua filifilia e le Malo e tusa o aiaiga o le faavae, ina ua faailoa e le Fofoga Fetalai lea filifiliga i le toe usuia i le vaiaso nei o le fono aoao faitulafono mo le masina faai’u o lenei tausaga o le a mae’a.

O le to’atolu o tamalii ua filifilia ua toe tusi aao ai le Palemene i le afioga i le Tui Atua Tupua Tamasese Efi e avea ma se tasi o Sui o le Fono a Sui Tofia i le tuana’i o le sefulu tausaga sa se’ei ai i le tofiga Ao o le Malo, lea sa amata lona tofiga i le tausaga e 2007 ae mae’a i le tausaga e 2017.

O sui e to’alua ua filifilia faatasi ma le Tuiatua poo le afioga i le Tamaaiga i le tofiga o Sui o le Fono a Sui Tofia, o le afioga i le Tapaau Faasisina, Susuga Malietoa Moli II Malietoa, ma le Afioga Laulu Tiatia Mapesone Mapuilesua o se tamalii sa tauva i le tofi o le itumalo o Palauli le Falefa i ni palota ua tuana’i e aofia ai le palota tele o le tausaga e 2021.

O le masina amata o le tausaga fou 2025 e amata aloa’ia ai tofiga o i latou e to’atolu ua filifilia i le tofiga o Sui o le Fono a Sui Tofia.

E to’atolu tagata e tauaveina le tofiga lenei e pei ona aiaia i le faavae o le atunuu.

O le Tuiatua poo le afioga i le tamaaiga afioga Tupua Tamasese Efi na filifilia muamua i le tofiga o le Sui o le Fono a Sui Tofia poo le Sui Ao o le malo i le tausaga e 2004, o se tofiga sa ia tauave mo le tolu tausaga ae filifilia ai loa e le Palemene i le tausaga e 2007 e avea ma Ao o le Malo.

O le taimi muamua lea na tauave ai e le Ao o le Malo lea tofiga mo le lima tausaga lea a mae’a e toe iloilo e le Palemene.

Peitai na fanau mai ai nisi o teuteuga o le faavae mo lea tofiga taualoa ma faaaloalogia ina ua faatapulaa i le lua nofoaiga ta’ilima tausaga a se tasi e avea ma Ao o le Malo, ona faamuta loa lea.

O le tausaga e 2017 i le masina o Iulai na filifilia ai le tasi o tamaaiga sa ia tauave le tofi sui o le fono ma le sui tofia le Afioga Tuimalealiifano Vaaletoa Sualauvi II e na te tauave le tofiga Ao o le Malo.

O le tausaga e 2022 na toe filifilia ai ina ua tusiaao le faigamalo a le Faatuatua i le Atua Samoa ua tasi lea foi na talia e le Palemene na te toe tauave lea tofiga.

O lana nofoaiga mulimuli foi lea o le a mae’a ia Iulai o le tausaga e 2027.

O le afioga Le Mamea Ropati na filifilia i lea tofiga taualoa i le tausaga e 2016 i le masina o Fepuari ma o le a mae’a lona tofiga i le faai’uga o le masina nei o Tesema e pei ona faailoa i le Palemene e le Fofoga Fetalai, Susuga Papalii Li’o Oloipola Ta’eu Masipa’u.

Sa filifilia faatasi Le Mamea Ropati ma le Afioga Tuiloma Pule Lameko e avea ma Sui o le Fono a Sui Tofia i le tausaga e 2016, ae ina ua tuumalo Tuiloma Pule Lameko i le tausaga e 2018 sa tauave to’atasi mai ai loa e le Afioga Le Mamea Ropati Mualia lea tofiga ua tusa ai nei ma le ono tausaga.

E iai le talitonuga o le toe amatalia o galuega uma a le Malo i le masina o Ianuari pe a mae’a mālōlōga o le Kerisimasi ma le Tausaga Fou o le a faamautū ai se aso e faia ai le faatautoga o sui filifilia e to’atolu mo le tofiga o le sui o le fono a sui tofia poo le Sui Ao o le Malo.