O le jersey poo le ofu taalo fou ua faalauiloa mai nei a le All Blacks, e tapena ai le togiga a le ‘au mo le taamilosaga o le Ipu a le Lalolagi i Falani i le tausaga nei, ua iai ni suiga laiti poo ni vaaiga fou ua iai.
O lea ua toe fai le kola o le jersey, o se mea ua leva e lei toe vaaia i ofu taalo a le All Blacks talu mai le tausaga 1995, lea na faia’ina ai ia Aferika i Saute i le final i Ellis Park, vagana ai o lea ua uliuli le kola o le ofu i le taimi nei, auā o le kola pa’epa’e sa iai muamua.
O le ofu lenei o le All Blacks sa mamanu e se tagata Falani o “Fey the Wolf”, o se tagata e nofo i Pale i Falani ma e iloga i ana ata e vali solo i magaala, ma na ta’ua e lea tagata mamanu (designer), o se miti ua taulau mo ia ma o se matuā faaeaea lona maua o le avanoa e mamanu ai le ata o le ofu o lenei ‘au lauiloa i le lalolagi o le lakapi.
O le isi vaaiga fou i le ofu a le ‘au, o le faailoga (emblem) o loo faia a’e i lau o pama (ferns) e 14 ma e eseese uma sizes poo le tetelē o nei laupama o loo kava uma ai le ofu i se vaaiga iloagatā, ae o loo faaata mai ai le eseese uma o tupuaga o tama taaalo ma le eseese foi o latou tomai.
Peitai o le atoaga o le emblem, ua faatulaga ai le LOGO a le ‘au e avea o le fern lona 15, ma e faasasaga uma agai i totonu le faatulagaina ina ia faafoliga mai ai le faailoga o le USO (“USO” mark).
O le USO o se upu Samoa pe a faasino atu e se tama i sona uso (brother) poo se tamaitai i sona foi uso (sister), ae i nei aso i le tele o taimi e faaaogā ai le upu USO, e pei o se upu e momoli ai lagona alofa mafanafana i faiā, e tusa pe leai ni sootaga tau toto, ae ua USO ona o sootaga i taaloga, i galuega, i faalapotopotoga ma soo se mea lava e auaufaatasi ai ma galulue faatasi mo se faamoemoega e tasi.
O loo ta’ua i le tusitusiga a le Newshub o lenei suiga fou i foliga o le ofu a le ‘au a Niu Sila, o le faatulagaina o le LOGO ina ia atagia mai le faailoga o le upu Samoa o le USO, e amanaia ai ma faatāua o le sootaga i totonu o le va o tama taaalo a le All Blacks.
O le upu uso o se upu masani e faaaogā i aso faisoo, ae o le tulai mai o le TOA SAMOA ina ua maoa’e le faatinoga o lana talo i le Ipu o le Lalolagi o le lakapi liki i le tausaga talu ai, na matuā toe lalaga ai lenei upu USO aemaise lava ina ua faaaogā mai e le alii Samoa ta’uta’ua i ata tifaga i Amerika, o Seiuli Dwayne Johnson poo The Rock, a o momoli mai ana faamanuiaga ma ona alofaaga mo tama taaalo uma o le Toa Samoa, ma ia ta’ua i latou o ona “USO”.
O se suiga ua eseese foi lagona faaalia iai, ona e mataina lenei suiga i le ofu taalo a le All Blacks.
O nisi e lagona le faagaeetia ona ua amanaia e le All Blacks le sao tele o tamafanau o Samoa o loo iai i le ‘au, auā e lē o lilo i lalo, e toatele foi tamafanau a isi atunuu o le Pasefika o loo taaalo mo le All Blacks, ae o lenei ua filifilia le upu faafeiloai a Samoa e avea o se vaega o le LOGO o le ofu taalo a le ‘au.
Ae o nisi foi ua fesiligia pe aisea ua vave ai ona apo e le All Blacks lenei upu iloga o faafeiloaia a tagata Samoa aemaise lava i tupulaga, ae o se upu o lea na iloga ai faafeiloaiga a fanau o Samoa, aemaise lava i ana tamafanau i taimi o faagatama, e pei ona tulai mai i le taimi na ta’uta’ua ai le Toa Samoa.
Pau le itu ua mautinoa ua matuā mitamita le designer mai Falani, le alii o “Fey the Wolf” na ua filifilia o ia e mamanuina le jersey a le All Blacks mo ana taaloga i le Ipu o le Lalolagi i Falani lea o le a amata i le faaiuga o Setema agai atu i le amataga o Oketopa o le tausaga lenei 2023.
