A o faamamalu i le Aso Gafua o lenei vaiaso le tāua o Tina ma lo latou aso faailogaina e ala i le aso malolo mo le atunuu atoa, ua aumai i le feau faamanuia a le sui o le faalapotopotoga mo atina’e a Malo Aufaatasi le UNDP se faamanatu tāua mo lo tatou atunuu ina ia mafaufau loloto iai, i le aulia mai o le Aso o Tina o Samoa ua atoa i le tausaga nei le 20 tausaga o faamanatu ma faatāua ai le sao o tina ma tamaitai.
O suesuega ua faamauina o loo ta’ua ai o le 40 pasene o tamaitai ma tina o Samoa i le va o le 15 ma le 49 tausaga o le soifua, sa aafia i sauaga tau feusuaiga, faaoolima, ma sauaga o le mafaufau ma o a latou uo ma taitoalua o loo mafua ai.
Ua faaalia e le sui o le UNDP i Samoa o Verena Linnneweber, o le taofia o sauaga nei, e faamoemoe uma i le galulue faatasi o pulega a nuu ma afioaga, aemaise o totonu o le lotoifale o aiga ma faatāua ai e le faauluuluga o lea auaunaga a Malo Aufaatasi le tatou alagaupu masani, “A malu i fale e malu foi i fafo”.
O le sini autu o le Aso o Tina o Samoa i lenei tausaga o le Matofi o Fausaga Mau, ma e ausia le tāua o lea autu i le maopoopo o pulega a nuu ma faatāua le sao o tina ma tamaitai o lo latou faalagiga, o latou o pae ma auli i totonu o aiga, nuu ma ekalesia.
