O le Aso Lua 14 o Oketopa 2025, e faataunuuina ai se aso fiafia, ae o se feiloa’iga a le (Fan Day) mamalu lautele o le ‘autaaalo o le lakapi liki a Samoa, le ‘au a tama’ita’i le Fetu Samoa ma le ‘au a alii le Toa Samoa.
E ui i le loulouā o le tau, e lē o avea lea ma tulaga e tuua ai le fia aga’i atu o le to’atele e molimauina, ma faaalia lo latou lagolago i tama ma teine taaalo – o ē ua fai ma avefu’a a le atunuu mo lenei taaloga.
Na taunuu mai i laufanua o Aotearoa nei le ‘autaaalo i le aoauli o le Aso Gafua o lenei vaiaso.
Ma na māua le faataunuuina ai o se ‘ava o feiloa’iga e faafeiloa’i ai ‘au a alii ma tama’ita’i.
Ma o lea ua faamauina le tapena ai o le to’atele o tagata ma pisinisi o le a iai i le afiafi o le Aso Lua mo le faatasiga, a o lumana’i ai le Aso Sa, 19 o Oketopa 2025 e faatautaia ulua’i taaloga ma ‘au a Niu Sila, Kiwis ma le Kiwi Ferns mo le Su’egāsiamupini o le Ipu a le Pasefika (PACIFIC CHAMPIONSHIP 2025).
O le a faatautaia le Fan Day i le itula e 4 aga’i i le 6 i le afiafi i le malaetaalo a le Mt Albert Rugby League.
Ae o le vaiaso fou i le Aso Lua foi lea, 21 o Oketopa o le a faatautaia ai se Fan Day a ‘au a le atunuu ma tagatānuu Samoa ma ē lagolago i ‘au i Kuiniselani Ausetalia.
E faamauina le to’atele o tagata Samoa iloga i Ausetalia o le a ‘auai i lea faamoemoe tāua.
Puna o Faamatalaga: https://www.loganarts.com.au/event/samoafanday/
