Ua mae’a le tāaga muamua o le palolo o lenei tausaga e pei ona sa molimauina le tetele i nisi o nofoaga o nuu e tā ai lenei matai’ai a le atunuu.
O lea ua faailoa e le Matāgaluega o Faato’aga ma Faigāfaiva i le latou upega tafa’ilagi o le aso 13 ma le 14 na asi muamua ai le palolo ia Oketopa ae o le masina fou o Novema o le aso 12 ma le 13.
O lona uiga o le po o le Aso Lua 11 o Novema a malama le Aso Lulu 12, ma le po o le Aso Lulu 12 o Novema a malama le Aso Tofi 13 o le masina fou lava e pa’ū tonu iai.
O le faamanatu mai le vaega o faigāfaiva a le matāgaluega o faato’aga ina ia toe sauni ma tapena mea tā palolo ma manatua lou saogalemu.
O Upolu o nofoaga e pei ona masani ona tā ai le palolo o Tuialamu i Lalomanu Aleipata, Falealili, Matautu Lefaga, Salamumu, ma Falelatai.
O Savaii o Safotu, Fagasa, Asau, Sataua, Papa, Puleia, ma Satupaitea.
O nisi foi nuu o le itumalo o Palauli ma le nuu o Tafua tai e masani ona maua ai le palolo i nisi tāaga.
