Ua faailoa e le Alii Minisita o Tupe ia Lautimuia Afoa Uelese Vaai le oo mai ai o le Faalapotopotoga o le International Monetary Fund i Samoa i sana asiasiga e ala i lana aufaigaluega.
O la latou misiona o le tilotilo lea i le tamaoaiga o lo tatou atunuu, asia o atinae o loo faamatuu mai ai seleni, ma o loo faia faatalanoaga ma la tatou aufaigaluega mai faauluuluga o Matagaluega, o faalapotopotoga a le malo, faalapotopotoga tuma’oti ma NGOs.
O se faatalanoaga i le polokalame a le EFKSTV ma le alii minisita na ia faailoa ai le tulaga ese o le agai mai ai o faalapotopotoga nei e tulimataia tamaoaiga o atunuu o le lalolagi i Samoa i lenei vaitau.
O lea faatoa foi le aumalaga a Faatonu o le Faletupe o le Lalolagi, faatoa mae’a atu foi le asiasiga a le Sui Peresetene o le Faletupe o Atinae a Asia talu ai nei ae o lea foi ua agai mai le malaga a le tasi faalapotopotoga o loo latou ofoina tupe fesoasoani i atinae o atunuu e aofia ai ma Samoa.
O le isi tulaga o loo ta’ua e le alii Minisita o a tatou aitalafu, lea ua tulimatai mai e lea foi faalapotopotoga le pa’ū ai, peitai e lē o toe faia lava se isi nonoga tupe fou.
Mo le silafia o Samoa sa iai i le vaega ogaoga o le maualuga o aitalafu fua i lona tamaoaiga, o le taimi nei ua palasi maualalo ma ua ausia le 55% – 33.8% o le GDP, ae ina ua fesiligia e a tatou tala le Alii Minisita na ia faailoa ai ua tusa ma le $880 miliona tala Samoa ua iai a tatou aitalafu i le taimi nei, mai le silia i le piliona na tulai atu le faigamalo fou o loo iai.
Na saunoa Lautimuia o loo tilotilo lea faalapotopotoga i le tulaga lea, ma o Novema o le tausaga nei e toe oo mai ai le galuega a lea vaega e faamautu atu a latou iloiloga ma e ono toe faailoa mai ai le toe mafai ona nonō o lo tatou atunuu.
Ua faailoa e le Alii Minisita e ono avea Samoa ma atunuu e fai ma faataitaiga lelei e faailoa atu e le faalapotopotoga i nisi atunuu o feagai ma luitau o aitalafu ona o le tulaga ua iai a tatou aitalafu, aemaise o lea e pa’ū aitalafu ae o loo faatino lava foi a tatou atinae i le taimi e tasi.
