O le vaega mai Iapani o loo galulue soosootau’au ma le Pulega a le Suavai i se tasi o poloketi ina ia faatupulaia o le lelei o le suavai i le atunuu lea na asia nofoaga o loo iai i lalo o le poloketi lea o loo faatupeina e le Malo o Iapani.
I pepa o faamatalaga, o le vaega lona lua o lenei poloketi o loo agai lea i le faasoaina o le tomai ma metotia i sui mai Iapani faapea ai ma sui o le Pulega.
O lenei foi poloketi o loo unaia ai le toe faaleleia o faatanoa o loo tapu’e ai le suavai i Fuluasou i Upolu nei ma Palauli i le motu tele i Salafai.
O le 2014 lea na amata faatino ai lenei poloketi i lona vaega muamua e atina’e ai ma faaleleia le suavai i nofoaga o loo i le talafatai o le taulaga sa mataituina ai le faatanoa o loo tapu’e ai le suavai i Alaoa.
Na faamae’aina lenei vaega muamua i le tausaga e 2019 ma sa faatupeina i lalo o le faalapotopotoga a le Malo o Iapani (JICA), o loo faamauina o lenei poloketi sa tele lona aoga i le faaleleia o le tulaga i le suavai oloo maua mai i Alaoa.
O le faamoemoe maumaututu o lenei poloketi ina ia faaauauina pea le galulue faatasi ai o nei vaega ina ia faatumauina le agai i luma o atina’e o loo faaaogaina e le atunuu i aso taitasi.
