Ole tofiga 4 tausaga ale Amepasa o le Iuni a Europa i le Pasefika Sujiro Seam na taualuga ai i sana asiasiga i nisi o poloketi i Samoa nei sa faatupeina e le Iuni a Europa.

O le poloketi faamamā suavai i le afioaga o Solosolo poo le ecology purification system o se tasi lenei o poloketi sa faatupeina e le Iuni a Europa lea na tatalaina i le tausaga ua mavae.

O le asiasiga a le Amepasa ma nisi o sui mai matagaluega a le Malo e maimoa le tulaga o loo faaaogaina ai lenei poloketi e le mamalu o le afioaga o Solosolo.

 O lenei poloketi o se tasi o vaega sa taimua ai le asosi a le Independent Water Schemes i lona faagaioiga ma o loo fausia lea i totonu o le lotoā a le Aoga Tulagalua a le afioaga.

O le tausisia i le mamā o le suavai taumafa mo le afioaga o le faamoemoe lena o le fausia ai o lenei poloketi ua faamanuiaina ai aiga.

Ma e faafetaia ai e le afioaga lenei poloketi ona o loo mafai ona fesoasoani i le faatumauina o le suavai taumafa mamā mo aiga o le afioaga.