O le usuia ai o le fono tele i Malua o lenei tausaga, ua lē gata ina malaga mai usugafono mai pulega ma matagaluega a le Ekalesia Faapotopotoga Kerisiano Samoa i atunuu i fafo ma Samoa, ae ua malaga mai ai foi nisi o autalavou.
O le avanoa lelei lea mo le aumalaga o tupulaga talavou a le Ekalesia EFKS i Dandenong i le setete o Victoria i Ausetalia ua latou asia ai ma le nofoaga o le Campus of Hope i le lotoā a le faalapotopotoga o le Toomaga mo ē Puapuagatia i Tuanaimato.
O se asiasiga na feiloai ai tama ma teine talavou mai lea aumalaga i alo ma fanau a le atunuu ua sauaina, o loo tausia ma vaaia i le nofoaga.
O se avanoa sa mafuta faatasi ai ma faia ni taaloga ma ni pesepesega, o se tasi o auala lelei e fesoasoani ai i mafaufau o ia fanau a le atunuu ua aafia i sauaga o le tino ma le mafaufau.
Sa faia se foai tupe a le autalavou mo le nofoaga faapea foi ona latou faatauina nisi o oloa o galuega taulima o loo gaosia i le nofoaga e alo ma fanau sauaina.
O le susuga i le A’oa’o ua iu mai le Kolisi Faafaifeau i Malua le susuga Dominic Ta’eleipu sa ia ta’ita’ia le aumalaga o sui o le autalavou a Dandenong i le asiasiga i le nofoaga o le Campus of Hope i Tuanaimato.
