O loo iai lipoti ua ta’ua ai le aoina e saienitisi o ni faamaumauga tau le siosiomaga e aofia ai otaota mai meaola ina ia fesoasoani i se poloketi tau suesuega ua faia ina ia maua ai se malamalamaga e faatatau i le avian influenza lea e aafia ai manufelelei ma isi vairusi e ono aafia ai Niu Sila.
O le ituaiga flu o le H5N1 strain na maitauina talu ai nei i le Anetatika ma avea ai le Oceania o le konetineta e tasi e lei oo mai iai lea ituaiga vairusi.
O le suesuega la lea a le Te Niwha o loo taitaia e le polofesa mai le Iunivesite o Otago, Jemma Geoghegan ma David Winter mai le Institute of Environmental Science and Research o loo fai faapaaga ai ma komiuniti faalotoifale.
Fai mai le polofesa o le avian influenza ua pepē ai le faitau miliona o manu felelei.
O samples la o loo aoina mai nofoaga e pei o le sami, matafaga ma vaega e maua iai manu.
Fai mai le polofesa e pei foi ona faia i le taimi o le koviti, o loo fia faamautinoa foi o loo maua le malamalamaga e uiga i lea faamai ina ia mafai ona tali atu ai i le isi luitau e sosoo mai.
