E 8 atunuu o le Pasefika ua filifilia e aofia ai ma Samoa latou te totōina laau tau faato’aga, ona faata’ita’i lea iai o isi atunuu i auala ma faiga e ola ma fua lelei ai ia laau tau faato’aga.
O Samoa ua filifilia na te totō le laau o le koko ma faatino ai auala silisili ona lelei ma saogalemu e atina’e ai ina ia lelei ona fua mo le faaaogāina.
O se polokalame fesoasoani a le malo o Saina i se faigāpaaga ma le faalapotopotoga o taumafa a le lalolagi le F.A.O.
O le koko o se laau tau faato’aga o loo to’atele faifaato’aga laiti i lo tatou atunuu o loo latou totōina, ma o le māfua’aga lea o le aumai o lea laau tau faato’aga e atina’e e Samoa.
O isi atunuu o loo aofia i le polokalame o Fiti o loo latou atina’e le laau o le āno poo le turmeric, o le Atu Kuki o le talo e ola i nofoaga faataufusi e tele ai le vai, o Solomona o le manioka, o Tonga o le ufi suamalie poo le sweet yam, o Tuvalu o loo totōina le laau o le ‘ulu, ma atunuu o Nauru ma Vanuatu ua atina’e ai lafu puaa poo atina’e o meaituaolo.
O le fesoasoani a le malo o Saina e faatupe lea polokalame tau faato’aga e tauala i le faigāpaaga ma le F.A.O. o se tasi o taumafaiga e faamauina ai sootaga faavaomalo o Samoa ma lea atunuu ua atoa i le tausaga nei le 50 tausaga o ia sootaga faavaomalo.
