Ua filifili e Amerika Samoa ona ta’ita’i mo le isi fā tausaga o lumana’i ma ua faailoa mai i i’uga o le palota na faia ananafi o Pulaalii Nikolao Pula ma Pulu Ae Ae Jr lea ua manumalo i palota e 5,846 na o la maua e tusa lea o le 59.8 pasene o palota na faia, ae o le Kovana sa iai o Lemanu Peleti Mauga ma le Lutena Kovana o Laapui Talauega Ale e 3,925 palota na maua e tusa o le 40.2 pasene o palota na faia.

E ui la o loo faatalia aso e fitu e faamaonia ai ua aloa’ia ia i’uga peitai ua faailoa le agaga fiafia o i latou sa lagolago i le vaega ua manumalo nei.

O Pulaalii ua loa tausaga o auauna o le faatonu o le ofisa o le Teritori ma mataupu faalotoifale, e silia ma le 20 tausaga a o Pulu o se tamalii sa tautua i le ami a Amerika ua mālōlō litaea ma sa faaulu iai le ofisa o le Pago Pago Field Office o le tamaitai o Uifaatali Amata mo le 10 tausaga talu ai ma sa avea foi o se sui o le Maota o le Fono a Amerika Samoa i tausaga ua te’a.

O le aso 3 o Ianuari e faatauto ai ia ta’ita’i fou ma o le la faamatalaga e pei ona lipotia i le RNZ e mana’omia le omai faatasi o tagata o Amerika Samoa e fofo ni faaletonu ma ni manu’aga na afua ane i faiga campaign sa faia, ae alofa le isi i le isi ma faataga le agaga o le Atua e ta’ita’i le atunuu i le lumana’i. 

Puna o Faamatalaga: https://www.rnz.co.nz/international/pacific-news/534399/american-samoa-elects-new-governor-and-lieutenant-governor-in-runoff-unofficial-results