Ua fuafua le peresetene o Amerika, Joe Biden e aveese mai le faaupuga faasaga ia Cuba e faapea o se lagolago o faiga faatupu faalavelave, ma o se vaega lea o se maliega mo le faasa’olotoina o pagota e pei ona faamaonia mai e le fale Pa’epa’e i le vaiaso nei.
Fai mai le BBC o se taimi mulimuli ane na folafola ai e Cuba le faasa’olotoina o le 553 o pagota o loo latou taofia ma o loo talotalo o le a aofia ai ma nisi sa aofia i se solotetee faasaga i le malo sa faia i le 4 tausaga talu ai.
O le taimi ua lamalama faai’u le nofoaiga a Trump i le tausaga 2021 na ia toe tuuina ai le faaupuga lea e faatatau ia Cuba ma faasā ai ma fesoasoani tau tupe ma a’upega ona aveina atu ia Cuba, peitai o lea ua manatu le faigamalo a Biden e aveese lea faaupuga.
Fai mai Cuba o le gaioiga ua faia o se laasaga i le itu sa’o.
Puna o Faamatalaga: https://www.bbc.com/news/articles/c17e0k92g41o
