O le vaiaso nei o loo faaauau mai ai le tauvaga ailao afi a le lalolagi atoa i le nofoaga o Aganuu a le atu Polenisia i Hawaii.
O le polokalame lenei o se faatasiga tele e auai ai le toatele o tagata Samoa o loo alala i Hawaii.
O lenei faamoemoe o se vaega o le polokalame a fanau aoga i le Kolisi e ta’ua o le “We are Samoa Festival” na faavaeina mai ina ia faatumauina ai pea le aganuu a Samoa i aoaoga ma galuega faatino e pei o faafiafiaga ma isi.
O lenei tauvaga sa tuuina ai se feau tusitusia a le Afioga i le Palemia o Samoa, Fiame Naomi Mataafa e pei ona faasalalauina e le upega tafailagi a le Malo.
“O le ailao afi o se vaega pito sili lea ona tāua i le faalauiloaina o le aganuu a lo tatou atunuu i le lalolagi i le tele o tausaga.”
O le lona 30 ai lenei o tausaga o faatautaia pea lenei tauvaga ma na ta’ua e Fiame o se tulaga foi e manatua ai tuaa ua lagomau mai i tiasa sa amataina lenei faagatama.
“Ia avea lenei tauvaga e fai ma faamanatu ia aua ne’i o tatou faagaloina i latou sa fofoaina mai la tatou aganuu.”
Na faafetaia e le Palemia i latou sa fitoitonu ai tapenaga o lenei faamoemoe e le gata i le faatautaiga o le tauvaga aemaise ai foi o nisi o faatinoga faa-Samoa e pei o pese ma siva ma le tele o vaega o le aganuu.
O lenei faamoemoe o loo fuafua e faamae’aina i le Aso Tofi o le vaiaso nei.
