Ua amata faagasolo nei le totogiina atu o peimeni mo i latou sa aafia i ni sauaga a o vaaia pe tausia foi i nofoaga sa tausia ai.

O minisita o le auaunaga lautele o Chris Hipkins ma le minisita o le Social Development and Employment o Carmel Sepuloni na o la faailoa o lea ua amata le vaega lea o le tuuina atu o totogi poo peimeni ia i latou ua aafia i nei tulaga ma o loo ave le faamuamua ia i latou e le o malolosi ma e silia ma le tai 70 tausaga le matutua ma ua leva se taimi o faatali mo nei totogi. 

O se mataupu sa siasila ai i mafatiaga sa feagai ma latou aemaise o se taimi umi sa faatalitali ai mo se tali ane o a latou talosaga ma o se tasi lenei o vaega o taumafaiga a le malo e fesoasoani ma lagolago ai ia i latou sa aafia i ni ituaiga sauaga i tausaga ua tuanai.

Ua faailoa e Hipkins o se faasilasilaga e faatatau i se faatoesega e faia ia i latou uma na aafia i lenei mataupu o le a faailoa lea i le tausaga fou.