I le silia ai nei ma le tausaga ma masina e lima talu ona tupu le faalavelave tau taavale i se vaega o le alatele i Malifa ia Oketopa o le tausaga 2023, lea na maliliu ai tagata e to’alua ae manunu’a le silia i le 30 o le pasese, o le Aso Tofi na te’a nei na faato’ā lau ai le faasalaga a le faamasinoga faasaga i lē na aveina le pasi.

O Togamataimoana Vaea sa ia faatautaia le pasi o le Laumosooi sa ia ioeina moliaga o le fasioti tagata pa’ivalea e mafua i lea faalavelave tau taavale ma moliaga o le ave taavale faatamala na oo ai manu’a i nisi o le pasese, ua amata tuli nei lona faasalaga faafalepuipui e 8 tausaga ma le 3 masina.

O le suia o lana tetee i le tali ioe i moliaga uma a leoleo ua faaalia e le faamasinoga o se itu lelei lea mo ia, ona ua faasaoina ai nisi o le pasese sa faatulaga e molimau mai le toe mafaufau i le Aso Gafua, le aso 2 o Oketopa o le tausaga 2023 na tupu ai le faalavelave i le taeao i Malifa i le taimi ua usu fanau a’oga ma tagata faigaluega.

Na tupu le faalavelave e lē o mafai ona fealua’i le pasi ona e tele vaega sa faatonuina e le au pasi taavale a le pulega o feoa’iga i le laueleele e tatau ona faaleleia.

O Setema o le 2023 na faia ai le faai’uga e lē pasia le taavale, ae sa faaauau lava ona fealua’i ma tupu ai le faalavelave ia Oketopa o le tausaga lava lea.

O le pasi na aafia sa laisene e fealua’i i le va o Apia ma le afio’aga o Sapunaoa i Falealili e ui i le alatele mai Siumu, oo ane i Tiavi ma aga’i ai i Apia.

O le to’atele o le pasese sa malaga i le aso o le faalavelave e mai lea faaitu o Upolu.

E lima tausaga ua faasā ai e le faamasinoga ona toe umia e Togamataimoana se laisene avetaavale, ma e faato’ā mafai ona toe maua sea laisene pe a mae’a ona auai i a’oga mo tagata e fia maua se laisene avetaavale.